وازاي اهرب منك وانتي ساكنة في دمي
هربت ليكي مني
واتاريكي سبب همي
مش عارف اكرهك ولا اقول انك امي
امي ازاي وانت عطشانة لدمي
وضعت انا فيكي مني
حتى عنواني تاه في حروف اسمك الغريب عني
وضاع
العمر مني
وانا بدور عليكي كما المجنون
واتاريكي شوكة في ظهري
يا بلد مكتوب عليها الحزن وفيكي موتي بقى
حتمي
اهرب منك الاقيكي مسجونة في قلبي
اغمض عيني عنك تكسري رمشي
اسكت والصرخة وجعاني
في عز الخوف تقوليلي غني
اغني ازاي وانا عويل الموت جمبي
اجري اشوف ده اخويا ولا ولد عمي
واتاريها روحي بتجري عليهم وانا سابح في دمي
ودموع امي مغرقة خدي
تاركك للابد غصب عني
روحي متحررة منك
وانتي رافضة أي معنى
غير
انك لجسدي تضمي
وكأنك بتعلني ان من المستحيل خروجك مني
اتركي قلبي العليل
يشفى في بعده عنك
اتركيه يمكن يعيش
بعد اما هجر الحياة في قربه منك
اتركيني وحرريني من حبي ليكي
اتركيني وحرريني من خوفي فيكي
اتركيني وحرريني من احلامي الي ضاعت
اتركيني وحرريني من الكلمة الي صارت
حلم تايه في ارضك
حلم مش شايف الا ظلمك
حلم كان حتة منك
حلم كان صرخة ليكي
حلم كان اسم ومعنى
حلم صار صورة وصوت
حلم أصبح ذكرى وموت
حلم كان مضمونة كلمة
معناها كبير
حلم كان رسمة حلوة
الوانها كتير
حلم كان كفره بيكي مستحيل
حلم كان بين قوسين
اسم مصر بيسبقه
كل خير
.jpg)
0 التعليقات:
إرسال تعليق