عارف لما بتيجي عليا ساعات وأزعل منك على اتفه حاجة وتقعد تقلي انتي بتدلعي , ساعتها ببقى عارفة أني مزوداها

بس ببقى عارفة بردو أنك مزودها أكترمني بإهمالك ليه وببقى هتجنن لما افكر ان في دقيقة في حياتك فكرت فيها في حاجة وانا مش معاك فيها

عارفة أن الدنيا زحمة ومشاكلها كتير بس فكرك هتحلها لوحدك وانت واخد جمب وبعيد عني , امال ازاي اخترتني عشان اشاركك حياتك

عارفة ان ممكن تكون بتقول في نفسك وانا احكيلها ليه واضايقها ليه ,  عارفة انك بتعمل كده عشان متزعلنيش بس ده في حد ذاته بيزعلني

لانك مش بس حبيبي انت حبيبي وابني انت نصي التاني وتوام روحي ومن حقي أحضن همومك الي هي همومي  ونحلها سوى

حتى يا سيدي لو انت شايف عقلي مش قد كده خدني على قده وقولي شاركيني ,مش يمكن وانت بتحكيلي تلاقي الحل في عيوني , ولا ناسي انك كنت دايما بتقلي انهم  مرايتك

عارف حتى لما بكون تعبانة وانت مش واخد بالك ولما حتى بتنسى تقلي سلامتك , انا عارفة ان مبيكنش قصدك لان مفيش حد بيقول لنفسه سلامتك

بس المشكلة مش في أنك مقلتهاش , المشكلة أنك عودتني عالدلع في الأول أيام مكنا اتنين , متجيش في ثانية واحنا واحد  تنسى حتى تاخد بالك من نفسك

هو يعني عشان عندك شغل كتير ودماغك شغالة ومش فاضية هتنسى ان روحك ليها عليك حق وتنسى تروي عطشها بالصلاة زي مدي روحك انا نفسك , حد ينسى نفسه , ولا انت ماشي على سطر وسطر ونسيت ان حبيبي وحبيبك موصيك بيه

طيب أقلك على حاجة كمان ومتقلش عليه اتجننت أنا لما بتاخد بنتنا في حضنك وانا قاعدة جمبكوا بتفرج ببقى خلاص على اخري وزعلانة

أكيد مش لأنك حضنتها بس لأنك نسيت انك وعدتني زمان انك متفرقش بين ولادنا وتحضنهم سوى ونسيت أنك قلتلي اني مراتك وبنتك وبيتك ودنيتك

بزعل عشان نسيت كلامك  , مش لاني عاوزة ادلع عليك ولو ان ده من حقي , بس عشان مش عاوزة احس في مرة انك رجعت في كلامك لان ده الي بيحسسني بأمانك

طيب عارف حاجة كمان لما بطبخكلك حاجة وتاكلها وتقلي جميلة ويبقى قلبي طاير من الفرحة وتقوم منزلني من سابع سما لسابع ارض وتختمها وتقلي بس ماما كانت بتعملها احسن

ببقى عاوزة اجري بعيد واعيط وبعمل فيها هبلة واقلبها زعلة ونتخانق عشان اعيط براحتي من غير متقلي بتعيطي ليه بس والله انا مبيكنش قصدي

كل الموضوع انك كل مرة بتحسسني ان ماما ادتني أمانة وانا مكنتش قدها ومحفظتهاش زي مكانت بتعمل معاك وانا ببقى نفسي لما تشوها تقلها وهي معايا بلاقيكي فيها

عارفة ان مهما عملت مش هكون زيها بس عالاقل أكون وأنا جمبك معوضاك عن فراقها وفراق السنين الي عشتها معاها وسبتها وجيتلي

عارف أنا عارفة كويس انك لما بتزعلني بيبقى مش قصدك وانك بتكون هتموت وتصالحني بس سي السيد الي جواك بيمنعك فبدلع وازيد فيها لحد مشوف مين فينا عليك أغلى انا ولا سي السيد

بيني وبينك ساعتها بقعد مع نفسي واراقبك وكل ثانية اقول هيكلمني واول متكح بس اتلكك واقلك سلامتك مع اني عارفة انك مش تعبان وبتتلكك عشان عارف ان سي السيد مش هيهون عليه

وبشوف ضحكتك الي بتضحكها من تحت لتحت وبدور وشي واضحك واحدة زيها وتقوم جاي مكلمني ولا كأن كان بينا حاجة واقلك بتكلمني ليه دلوقتي

تبصلي وتقلي الله مش انتي الي صالحتيني ببقى ساعتها هموت من الضحك بس ببصلك البصة اياها واهز براسي عشان مجريش عليك واخدك في حضني واعمل نفسي قال ايه تقيلة وانا خيبتي الي تقيلة بأمارة ان كل مرة بنفس الطريقة بتضحك عليه وأصالحك

عارف احيانا بيبقى نفسي وانت جاي وزهقان وحران وتعبان من الشغل وتعد عالكنبة وتعد تدي اوامر أوامر بيبقى نفسي تقلي هاتي المية والملح يا أمينة اهي حاجة تغير بيها روتين طلباتك

بدل مكل يوم هاتي الأكل سكتي العيال بطلوا دوشة زهقتونيي وكأننا احنا حضرة المدير العام الي هاريك شغل ليل ونهار وبتطلع الي فيك علينا

بس بيني وبينك بردو بيبقى في حاجة جوايا بجد هي الي بتتمنى  تقلها وانا بكل حب أعملها يمكن بيبقى نفسي زي مانت بتطلع موروثات سي السيد عليه أطلع طيبة امينة عليك

عشان بس تعرف فضل ربنا عليك لما رزقك بواحدة زيي مريحاك ومهنياك ومدلعاك وكمان  أصيلة وكلي طيبة وحنية

طيب بس بس بطل ضحك انا سامعاها من هنا وبعدين بتضحك ليه تنكرر يعني بزمتك هي أمينة عملت الي بعمله ده لسي السيد ولا فكرت حتى تكتبله ربع الجواب ده

انت لسة قاعد بتفكر قوم يالله اتوضى وصلي ركعتين شكر ونادي عليه عشان اصلي وراك بدل الاتنين عشرة على أكبر نعمة ربنا رزقني بيها وهي طيبتك وحنيتك عليه

Tweet
Share