في حب مصر أنا متهم ..  متيم بيها أكيد مش محتمل

حبي ليها حب أم لجنين مش مكتمل .. احساسها بيه بيديها في حياته الأمل

في حبي ليها سجلوني خطر .. وحنيني ليها فاق حدود البشر 

حبي ليها حب طير جناحه اتكسر .. دمه سال على وردة حزينة قطفها البشر

حبي ليها ورقة شجر طارت على سطح القمر .. منفوش عليها رسالة غرام باقية لآخر الزمن 

حبي ليها ورقة وقلم .. سجلوا ملحمة غيرت معنى الحب في قلوب البشر

حبي ليها حب لا يحتمل .. قلبي بيه كأنه معموله عمل

حبي ليها صفحة سما فيها نجوم كتير متنتورة 

غرقانة في بحر ظلم اسود حوالين قمر وحيد أنما .. رافض ينور بغير أشعة حبيبته المعلنة

حبي ليها حب طفل لطيارة ورق .. راسم أحلامه عليها بألوان خشب

حاضنة سحابة بيضة وطايرة في السما .. رايحة لنجمة دهبي تدفي حنينه لها

حبي ليها حب صبية ما بين صحابها ببسمتها منورة .. تضحك تسمع صوتها وكأنها

وتر كمان بيغني أنشودة حبي لها

حبي ليها خبر جملة اسمية مبتدئها اسمها .. حبي ليها حرف جر جر أشواقي لها

حبي ليها حب الارض للمطر .. وشوقي ليها شوق الأحبة للسهر

حبي ليها كتاب أدب , قصيدة عتاب و شعر هزل

حبي ليها رسمة عالحيط من هاوي رسم ملوش عمل

حبي ليها سماعة طبيب عاجزة عن كشف الخلل

حبي ليها  ألبوم صور سجين لصندوق خشب

حبي ليها حب صابني بنوع عجيب من العلل

حبي ليها نوع من الجنون ملوش سبب

حبي ليها حواديت بيتاخد منها العبر

حبي ليها ابتلاء وقدر 

حبي لها حب خطر

ملوش حل محتمل

Tweet
Share